Bio

La Banda de Gaites Camín de Fierro naz nel añu 2002 de la mano de la Escuela Municipal de Música de los Valles del Osu, qu’axunta a los aficionaos a la música de los conceyos de Santu Adrianu, Proaza y Teberga. D’entós p’acá, la banda esperimentó una evolución bien grande a base d’actuaciones, esperiencies y el pasu de más de 50 persones per esti proyectu.

A lo llargo d’estos casi 20 años, la banda trai al llombu un bon puñáu d’actuaciones en festivales internacionales, incluyendo l’Intercélticu de Lorient (2014) y dos discos: 10 años nel camín (2012) y Rock & Fierro (2021), nel que busquen sonoridaes nueves pal mundu de les bandes de gaites n’Asturies y que cunta cola collaboración de músicos reconocíos de la escena asturiana. Esti trabayu recueye, ente otros, el cantar col que se presenten a esti premiu.

Siéntilos en: https://camindefierro.es/

Cantar

Flacos y ensin peinar

Lletra: Toli Morilla

Mil novecientos cuarenta y dos.
Posguerra, fame, miseria y dolor.
Quién sabe cuántos guaḥes sin voz.
Fueron vendíos a dalgún comprador.

Güérfanos probes. Flacos y ensin peinar.
Arregladina-yos prestará.
Péina-y la raya un poco más.

Cerróse’l tratu con un apretón
de manes y una caxa de cartón.
Treinta mil pesetes de nuevu poder
na trestienda de Don Ramón. De Don Ramón.

Yera la mercancía perfeuta.
Cinco o seis años, sola na tierra.
La manteníen sos tíos en casa.
Non por amor, por el qué dirán

La vamos a vender, ¿cuánto podrá valer?
Arregladina-yos prestará.
De la miseria nos va a sacar.

Pero’l destín lo diba cambiar.
Per tol barriu espardióse la voz,
rodean el coche que la fue a buscar
y llegó armada I’autoridá.

Al día siguiente púdose lleer
qu’habíen detenío a los implicaos.
Lo que nun se supo ye qué foi meyor,
si dir al hospiciu o col comprador. Col comprador.

Bio

Rubén García y Carla Armas son dos compositores con una carrera mui notable llarada de premios y llogros.

Rubén García, nacíu en Zamora, estudió’l Títulu Superior de Música na especialidá de Composición, nel Conservatoriu de Castiella y Llión, en Salamanca. Les sos obres interpretáronse en diferentes países de tol mundu, y algamó dellos premios de composición en concursos internacionales n’España y tamién n’otros países como Italia o Xapón. Amás, como poeta tamién tien publicaos poemes n’asturllionés occidental, variedá llingüística na que ta escrita la lletra del cantar col que participen nesti premiu.

La xixonesa Carla Armas, tamién compositora, lleva casi ocho años al frente del so negociu propiu, componiendo, interpretando y produciendo música pa documentales, publicidá y audiovisuales en xeneral, amás d’ofrecer un serviciu bien simpáticu: componer canciones pop/rock personalizaes por encargu pa celebraciones y regalos únicos.

Siéntilos en http://carlaarmas.com/

Cantar

El que conoz a tierra

Lletra: Rubén García

Cuando’l cielu se vista d’esturninos
y das llouxas asciendan os fumeiros,
cuando a ñeve visite l’alta llomba
y amenacen os días del iviernu,

cuando’l monte s’escuenda tres a ñubre
y da vista s’oculte l’aveséu,
cuando as ñebras abracen a vallina
y as solombras os días fagan prietos,

nun me busques nos cielos elevaos
nin tampouco da sierra no cumbreiru,
nun seréi peiña altiva na montaña
nin testeiru crisáu que mira al cielu.

Cuando’l fríu recuerra l’anchu valle
y castigue’l couriscu a os peñeos,
cuando l’aire cenceñe l’esperanza
conxelada pol últimu relentu,

nun me busques nos cielos elevaos
nin tampouco da sierra no cumbreiru,
nun seréi peiña altiva na montaña
nin testeiru crisáu que mira al cielu.

Estaréi, das malladas, na más viella,
durmiréi xunta’l pía d’un carballu,
el que tien el tueru paciente y sabiu,
porque esi ye

el que conoz a tierra.

Bio

L-R ye un dúu formáu por Leticia González (voz y percusión) y Rubén Bada (guitarres eléctriques) que reinterpreta la música asturiana cola mira de facer una llectura personal de los ritmos tradicionales pal baille amestándo-yos otros soníos averaos al blues y al rock. La so intención ye allegase a públicos nuevos y poner en contactu a la sociedá coles músiques de raigañu, cola idea de revisar y tresformar los términos dende los que se pensaba la rellación ente tradición y modernidá na música d’Asturies.

Los dos músicos, perconocíos y valoraos nel ámbitu de la música tradicional y el folk asturianu, lleven nesti proyectu dende’l 2016. Nesti tiempu participaron en festivales y espacios culturales dientro y fuera de la península ibérica, que los llevaron a sitios como Irlanda, Francia, Inglaterra o Bretaña, onde collaboren davezu con músicos renomaos cono Sylvain Barou, Jacky Molard o Jean-Michel Veillón

Amás, tienen dos discos: el primeru, tituláu L-R Postfolk Asturianu; y N.O.S, onde s’alcuentra esti tema col que participen nel Premiu Camaretá al Meyor Cantar.

Siéntilos en https://l-rpostfolkasturianu.com/

Cantar

Veis volver (jota’i Cangas)

Lletra: Leticia González

Cousas que marchan, nun vuelven.
Historias que nun contabas,
qu’escondías na ḷḷamuerga
ya de nena bien pisabas.

Vien cumo l’aire,
vuelve marchar.
Nun hai memoria
sin señardá.

Cousas que fuxen pol tiempu.
Postales que nun mandesti.
Memoria d’aqueḷḷas ḷḷuces
que tu mui bien apaguesti.

Cousas que yá quedan solas
nas túas sábanas bordadas.
Puntadas de filu escuru,
yá todas esfilachadas.

Cousas que deixesti mudas
entarradas ente matos.
Versos que nun escribisti,
esborronaos garabatos.

Cousas que quedan bien dientro.
Sabor a chicoria amarga.
Postrera ḷḷuz de la infancia,
ḷḷuz ya solombra bien ḷḷarga.